L'articolo a cura della Uniun Ladins Val Badia e pubblicato sulla Usc di Ladins, parla della presentazione del libro Scedola-Patofies tenutasi il 6 aprile 2015 alla matinée culturala a San Martin de Tor (Bz).
FASCIA Y VAL BADIA S'INCUNTA POR N DANMISDÉ DE MUSIGA, AURELA CÖRTA Y CULTURA
En ocajiun dla tradizionala matinée culturala dla Uniun Ladins Val Badia en Lönesc de Pasca, él gnü presenté le liber "Patofies" de Manuel Riz, cun l'acompagnamënt musical de Martina Iori
Sciöche da tradiziun, á ince chësc ann l'Uniun Ladins Val Badia organisé la Matinée culturala en Lönesc de Pasca, ai 6.4.2015, tl gran salf dl Istitut Ladin de San Martin de Tor, atira do mëssa. Por l'ocajiun án ponsé da presenté le liber "Patofies" de Manuel Riz, che n'e nia ciamó gnü presenté tla Val Badia. Y por resté tl tema "fascian" él gnü invié a soné la ciantautoria jona Martina Iori.
Do la prejentaziun y le bëgngnü da pert dl presidënt dla ULVB Michael Moling, á la jënt gnüda alerch tosc podü ascuté la bela musiga dla jona fasciana, davagnadëssa di festivals internazionai de musiga SUNS y Liet, a chi che al tol pert vigni ann ciantarins, ciantauturs y musiconc di lingac de mendranza. Martina á soné y cianté da sora, mudan jö danter acompagnamënt cun chitara y ukulele.
An á podü aldì cianties scrites da Martina instëssa, reinterpretaziuns dl repertore tradizional ladin, cover internazionales y dantadöt süa ciantia "Viacon mia musega", cun chëra che ara á davagné i dui contest internazionai.
Spo él gnü le momënt de Manuel Riz, che á prejenté por la Val Badia so liber "Patofies", na racoiüda dles patofies gnüdes fora dal 2006 al 2013 t'La Usc di Ladins. Les ilustraziuns, caricatöres y i comics de Scedola él vigni letur d'La Usc che conësc, mo chësc liber i dá la poscibilité ince a d'atres porsones, ince da foradecá, de conësce l'opera de Manuel y les dinamiches, problematiches y i temesc dles valades ladines. Le liber á albü n gran suzes, tan che al è gnü premié pro le Lucca Comics & Games -fiera de comisc, animazun y jüc- cun na menziun speziala dla juria "Gran Guinigi", n pest che an pó definì l'Oscar dl comics.
Pro le marcé di libri metü sö por l'ocajiun, á i prejënc podü cumpré le liber de Manuel Riz, sciöche ince d'atri libri dla Uniun Ladins Val Badia. A che che á spocumpré le liber i èl gnü scinché na stampa fata a man de n dessëgn de Manuel. Chëstes stampes é gnüdes fates a man al momënt, dal artist badiot Emil Valentini, che á stampé cun la tecnica dla serigrafia. La jënt á desmostré gran interes por chësta forma artejanala de stampa y, moiüs dala curiosité, é tröc stá plü di a damané fora co che chësta tecnica funzionëia.
Tratan la festa él spo sambëgn gnü cufé sciöche da tradiziun. I presënc á podü marné cun na bona bona liagna blancia, acompagnada da n gote de vin, na bira de formënt o n slüch de pom. Por l'ocajiun é i üs da cufé gnüs abelis cun n portaüs cun dic ladins da rì, y les mëses cun les vignetes de Manuel Riz sciöche tovaia. La Uniun Ladins Val Badia ó rengrazié düc i presënc por avëi passé cun nos chësc danmisdé, chi che á daidé y l'Istitut Ladin Micurá de Rü por la desponibilité.
