L'articolo a cura di David Lardschneider della Usc di Ladins, parla dell'inaugurazione del Dolomites Shop presso il Circolo a Ortisei.
DOLOMITES SHOP PER VENDËR LA DOLOMITES
Marketing uel dì savëi da vënder si prudoc. La criatività de Manuel Riz fej a na maniera che si ciociul, si jopes y si vin va via sciche i semli, tla butëiga nueva tla sënta dla Lia Mostra d'Ert a Urtijëi
"Cun la prima fiocheda da d'inviern sons unic da Fascia ca a Urtijëi. De gra al Chemun de Urtijëi dla lizënza, y śën pudons giaurì la butëiga." Nscila à dit Manuel Riz dan taië la pinta, metuda adum da lianies, y lascè ite un a un te butëiga nueva, sambën cun na sort de cherta-schipas "Mc Dolomites" cun lessù na purzion de pommes frites y do avëi maià na fëta de pinta, scusëda, de liania.
Manuel Riz à pona spiegà dedite plu avisa, de coche l ie unì damandà de fé na mostra: "Pra giaurides de mostres vëniel for damandà sce l ie pa nce zeche da maië y da bever. Perchël me éi mpensà de lascé vester l ntëurvia, y de pité diretamënter de bona roba da maië per granc y pitli. Nsci iel plu sortes de prudoc, la jopa Dolomiti Suppeski, cun doi purzions, y scencajo che n ie single pona mëten chëla che resta te dlaciadoia, ulache la resta annorum; da maië ne n'iela nia plu, ma la uega coche cëira per i schi. Pona iel l vin particuler, cun l palon tacà pra boza, ulache n sofla ite, y sce chiche ie dlongia tofa ora puz da alcol, pona iel miec a ne se nstradé nia. Inant vàla cun la Piz Boè y l ciociul Hello Speck, ajache ala fin dla finedes iel pa for mi i mëndri che ti dij a tati y mami cie cumpré."
Nsciuma, duta na lingia de prudoc, de bona roba da maië y de prudoc, de bona roba da maië y da bever. Manuel Riz ie n espert, ajache da jëunn àl "fat n stage te una na utia da mont y n erasmus tl'autra."
Danterite y danterora vëndel nce cosses nia da maië. Mé per dì la tofla da mëter su per la stredes su per i jëufs, ulache L ie da mëter a verda sibe ai cërves che ai motores. Y nscila, per sparanië, per raziunalisé, àl fat na tofla per l trafich cun lessù n cërf che va cun l motor.
L "Dolomites Shop" de Manuel Riz ie unì metù a jì n cunlaurazion cun la Lia mostra d'Ert. La Mostra de Manuel tla sala dla Lia a Urtijëi, plaza de Sant Antone, ie da udëi nchin vënderdi dala 16.00 nchin la 19.00, y de sada y dumënia 10.00-12.00 y 16.00-19.00.
La reflescion che ie dovia ie che "cun l unì su dl turism de massa tla Dolomites ie i luesc y i crëps unic trasfurmei te na merca che i turisć recunësc. I raions à mpue'perdù si autentizità, se trasfurman te n prudot "last-minute" o te pachetli de feries "all inclusive". Ora dl nia iel unì crià zëntri, strutures y mplanc, y dala stënta iesen ruvei al bënsté. Ma chësc à nce purtà cunseguënzes manco bones. Ti ultimi ani àn scumencià a pensé do co manejé l raionm nce per ti unì ancontra ala zertificazion Unesco."
L lëur, realisà da Manuel Riz, artista satirich de Cianacei, se ispira a chisc fenomens. Inuemes, chedri iconics, slogans y stereotips prejënc tl raion alpin se mescëida cun i loghi nternaziunei. Cun chësc proiet à l autëur purvà a purté n pensier positif per valorisé y se nuzé dl potenzial de n raion coche l nost te na maniera cuscienta y tl respet dl daunì. La roba metuda ora te butëiga ie sambën da cumpré, sce ëis i scioldi aldò.
